حتى الراجحي مات ..!!؟

يا اللي فــ دنياك دايم كلمتك : هات
حاول ولو يوم تعطي .. لو أحاسيس

لا تامن الموت " حتى الراجحي مات " !!
وقبره تجاور له قبور " المفاليس "

ما دامه العمر توّه ما بعد فات
كن مرة إنسان .. وبكل المقاييس

قدام الايام تاخذك لـــ متاهات
من عالم " النور " إلى " خلف الكواليس "

.....

يا ثقل دم السنين وما تقوله
كل الحكايات من فمها : ثقيلة

تلعب بنا أيامها دور البطولة
والمسرحية : إذا طالت : هزيلة

غياب الأحباب فيها .. وبـــ سهولة !!
دام المواعيد فيها : مستحيلة

اللي تبي من مشاعرنا : تطوله
ويدينها كل ما مدت : بخيلة

مرات .. تركض بخطواتٍ عجولة
ومن يعترض دربها .. عنها تزيله

ومرات تصبح خطاويها : خجولة
تلقط نفسها .. وما حطت : تشيله

أحدٍ تسهــّل لــ مطلوبه وصوله
تسقيه " كوثر " طلبه وسلسبيله

كنه يقدّم لــ حضرتها عمولة !!
بــ الجاه والمال يتساقط نخيله

يشيخ بـــ المال .. لو ما له حمولة
يصبح هو الشيخ .. والمال : القبيلة

وأحدٍ مع الفقر .. مثقلته حموله
في غايته .. ما تخلي له وسيلة

يرجع وجرحه يسولف عن ذبوله
والياس يصبح مع أحزانه حصيله